Ընտրիր շուկայում առկա և քեզ հարմար բեռնափոխադրող ընկերություններից մեկը (Գլոբբինգ, Օնեքս և այլն)։ Գրանցվիր՝ տրամադրելով․

• անձնագիր կամ նույնականացման քարտ,

• հեռախոսահամար,

• Էլեկտրոնային փոստի հասցե։
  
  

Ձևակերպիր ապրանքդ բեռնափոխադրող ընկերությունների հավելվածների միջոցով։ Կատարիր գնումդ, որից հետո կստանաս ապրանքի հսկիչ կոդ (tracking number):

Հսկիչ կոդի միջոցով կարող ես տեղեկանալ, թե տվյալ պահին որտեղ է գտնվում առաքանիդ և քանի օրից կլինի ՀՀ-ում։

Առաքանին Հայաստան հասնելուց հետո անվճար պահվում է 180 օր բեռնափոխադրող ընկերության պահեստում։ Նշված ժամկետը լրանալուց հետո առաքանին չվերցնելու դեպքում ստիպված կլինես հավելյալ գումար վճարել, որի չափը կորոշի բեռնափոխադրող ընկերությունը։

Եվրասիական տնտեսական միության անդամ երկրները՝ Հայաստանը, Ռուսաստանը, Բելառուսը, Ղազախստանը և Ղրղզստանը, ունեն միասնական մաքսային տարածք, որտեղ գործում են միասնական մաքսային կանոններ։

ԵԱՏՄ անդամ երկրների միջև ապրանքներ տեղափոխելիս մաքսատուրք չի գանձվում։

Այն երկրներում, որոնք ԵԱՏՄ անդամ չեն, գործում են ապրանքների մաքսազերծման այլ պայմաններ։ Օրինակ՝ Չինաստանից ապրանքներ ներմուծելու համար անհրաժեշտ է վճարել սահմանված մաքսատուրքեր։

Եթե ֆիզիկական անձի անունով ՀՀ ժամանած յուրաքանչյուր առաքանու արժեքը չի գերազանցում 200 եվրոն, իսկ քաշը չի գերազանցում 31 կգ-ը, ապա մաքսային վճար վճարելու անհրաժեշտություն չկա։

Եթե ներմուծվող առաքանու քաշը չի գերազանցում 31 կգ-ը, իսկ արժեքը գերազանցում է 200 եվրոն, ապա սահմանվում է 15% մաքսային վճար 200 եվրոն գերազանցող մասի համար։

Եթե առաքանու քաշը գերազանցում է 31 կգ-ը, ապա անհրաժեշտ է վճարել մաքսային վճար՝ առաքանու ամբողջ արժեքի 15%-ի չափով կամ 31 կգ-ը գերազանցող յուրաքանչյուր կգ-ի համար 2 եվրոյի չափով։

Մաքսավճարը կարող ես վճարել բանկերի և վճարային տերմինալների միջոցով։ Վճարման գործընթացի մասին քեզ կտեղեկացնի փոխադրող ընկերությունը։

Ի դեպ, մաքսային վճարումների և ապրանքների հայտարարագրման գործընթացը պարզեցնելու համար կարող ես դիմել բրոքերային ընկերություններին։

Երբ առաքանին ժամանում է Հայաստան և զննվում է մաքսային տեսուչի կողմից, կարող է առաջանալ հավելյալ փաստաթղթեր ներկայացնելու կարիք։ Այս դեպքում մաքսային տեսուչը կապ է հաստատում փոխադրող ընկերությունների ներկայացուցիչների հետ։ Փոխադրող ընկերությունն էլ իր հերթին տեղեկացնում է ֆիզիկական անձին, որ իր կողմից ներմուծված ապրանքը մաքսային տարածքում է։

Ներմուծված ապրանքը վերցնելու համար փոխադրող ըներությունները տեղեկացում են, թե ինչ հավելյալ փաստաթղթեր է պետք ներկայացնել։ Ֆիզիկական անձը կարող է օգտվել նաև բրոքերային ընկերությունների ծառայություններից ապրանքը մաքսազերծելու, հայտարարագրելու և մաքսավճար կատարելու համար։

Ապրանքի հայտարարագրումը մաքսային գործընթաց է, որի ընթացքում ապրանքներ ներմուծող անձը պաշտոնապես տեղեկացնում է մաքսայինին այդ ապրանքի մասին:

Ապրանքի հայտարարագրումը ներառում է՝

• ներմուծողի տվյալներ,
• ապրանքի անվանում և նկարագրություն,
• քանակ,
• արժեք և արժույթ,
• մաքսային ծածկագիր (HS կոդ),
• ապրանքի ծագման երկիր,
• մաքսային դրույքաչափեր և հարկեր։

Ապրանքների հայտարարագրման համար անհրաժեշտ է մաքսային ծառայությանը ներկայացնել հետևյալ փաստաթղթերը․

• ներմուծողի անձնագիրը կամ նույնականացման քարտը,
• հաշիվ-ապրանքագիր (ինվոյս),
• բեռնագիր կամ տրանսպորտային փաստաթուղթ,
• ապրանքի ծագման հավաստագիր (եթե կիրառելի է)։