Եթե անձը գտնվում է այնպիսի պետությունում, որտեղ չկա ՀՀ դեսպանություն կամ հյուպատոսական հիմնարկ, կամ այնպիսի հեռավոր վայրում, որտեղից հնարավոր չէ կամ դժվար է դիմել մոտակա ՀՀ դեսպանություն, ապա նա կարող է տեսակապով դիմել ՀՀ քաղաքացու անձնագիր ստանալու համար։

Տեսակապով ՀՀ քաղաքացու անձնագիր ստանալու համար անհրաժեշտ է նախապես էլեկտրոնային փոստով նամակ ուղարկել vid@mfa.am էլ․ հասցեին՝ վերնագրի դաշտում լատինատառ գրելով դիմողի անունը, ազգանունը և անձնագրի համարը։

Նամակի տեքստում անհրաժեշտ է նշել հետևյալ տեղեկատվությունը․

• դիմողի անունը, ազգանունը և հայրանունը,
• ծննդյան ամսաթիվը,
• անձնագրի համարը,
• բջջային հեռախոսահամարը,
• գտնվելու վայրը (երկիր, մարզ, քաղաք),
• կցել անձնագրի պատճենը կամ լուսանկարը, իսկ առաջին անգամ անձնագիր ստանալու դեպքում՝ օտարերկրյա պետության անձնագիրը, անչափահասի դեպքում՝ ծննդյան վկայականը և ծնողների անձնագրերի պատճենները կամ լուսանկարները,
• տեսակապով զանգ իրականացնելու հարմար օրերն ու ժամային միջակայքը՝ նշելով ժամային գոտին։

Տեսակապով նույնականացվելուց հետո անհրաժեշտ է ՀՀ քաղաքացու անձնագիր ստանալու համար պահանջվող փաստաթղթերը փոստային ծառայության միջոցով ուղարկել ՀՀ արտաքին գործերի նախարարություն։

Ներկայացվող պահանջները

ՀՀ քաղաքացու անձնագիր ստանալու համար անհրաժեշտ է՝

• գրանցված լինել Բնակչության պետական ռեգիստրում:

Պահանջվող փաստաթղթերը

Անհրաժեշտ է համապատասխան ՀՀ դեսպանություն կամ հյուպատոսական հիմնարկ ներկայացնել՝

• դիմում անձնագիր ստանալու մասին,
• 35x45 մմ չափսի 4 լուսանկար,
• արական սեռի քաղաքացիների դեպքում՝ զինվորական գրքույկը և դրա բոլոր էջի պատճենները, տեղեկանք զինվորական հաշվառման մասին կամ տարկետման մասին փաստաթուղթը և դրա պատճենը,
• պետական տուրքի վճարման անոդորրագիրը։

Վճարման չափը և կարգը

Տեսակապով դիմելու դեպքում անձնագիր ստանալու համար անհրաժեշտ է վճարել 90,000 դրամ։ Վճարումն անհրաժեշտ է կատարել առցանց եղանակով։

Անհրաժեշտ է նաև վճարել անհատական փոստային առաքման համար։ Անհատական փոստային առաքման ծառայության վճարը կազմում է 12,500 - 20,500 դրամ՝ կախված երկրից։ Փոստային առաքման վճարումն անհրաժեշտ է կատարել առցանց եղանակով։

Հնարավոր է նաև անձնագիրը դիմողին ուղարկել լիազորված անձի միջոցով։ Այս դեպքում փոստային առքման համար վճարելու կարիք չի լինի։

Տրամադրման ժամկետը և կարգը

Անձնագիրը տրամադրվում է դիմումը ներկայացնելուց հետո 3 ամսվա ընթացքում։

ՀՀ արտաքին գործերի նախարարության Հյուպատոսական վարչությունն անհատական փոստային առաքման միջոցով անձնագիրն ուղարկում է դիմողի կողմից նշված՝ օտարերկրյա պետության հասցեով։

Անձնագիրը լիազորված անձի միջոցով ստանալու դեպքում արտասահմանում գտնվող քաղաքացին լրացնում է լիազորագիր, որի միջոցով լիազորված անձը Արտաքին գործերի նախարարությունից ստանում է դիմողի՝ ՀՀ քաղաքացու անձնագիրը և այն ուղարկում դիմողին: 

Անձնագիրն ուղարկելուց հետո էլեկտրոնային փոստի միջոցով դիմողին է ուղարկվում փոստային առաքանու հսկիչ համարը, որի միջոցով հնարավոր է առցանց հետևել առաքանու ընթացքին։