Զբաղվածության ծրագրից օգտվելու համար պետք է դիմել Միասնական սոցիալական ծառայության ցանկացած տարածքային կենտրոն։

Ծրագրի մասին

Ծրագրի շրջանակում առաջարկվում է 3 հնարավորություն․

• Մասնագիտական ուսուցում և աշխատանքի տեղավորում, 
• աշխատանքային փորձի ձեռքբերում և աշխատանքի տեղավորում,
• մասնագիտական ուսուցում, վճարվող աշխատանքային պրակտիկա և աշխատանքի տեղավորում։
  
  

Մասնագիտական ուսուցում և աշխատանքի տեղավորում

• Ուսուցումը կարող է կազմակերպվել ինչպես գործատուի մոտ, եթե վերջինս բավարարում է  ուսուցումն իրականացնելու համար անհրաժեշտ պայմաններին, այնպես էլ գործատուի կողմից առաջարկված ուսումնական հաստատությունում։
• Ուսուցումը կարող է տևել մինչև 6 ամիս։ Այդ ընթացքում կտրամադրվի կրթաթոշակ՝ ամսական 50,000 դրամի չափով, և ամսական առավելագույնը ևս 50,000 դրամ՝ որպես ուսման վարձի փոխհատուցում։
• Ուսուցումն ավարտելուց հետո աշխատանքային պայմանագիր կկնքվի գործատուի հետ՝ առնվազն 3 ամիս ժամկետով և այդ 3 ամիսների համար գործատուին կտրամադրվի աջակցություն՝ ամսական 50,000 դրամի չափով՝ որպես շահառուի աշխատավարձից հաշվարկվող եկամտային հարկի, դրոշմանիշային վճարի և օրենքով սահմանված դեպքերում սոցիալական վճարի փոխհատուցում։

Աշխատանքային փորձի ձեռքբերում և աշխատանքի տեղավորում

• Ծրագրի շրջանակում շահառուի և գործատուի միջև կկնքվի աշխատանքային պայմանագիր՝ առնվազն 6 ամիս ժամկետով։ Առաջին 3 ամիսների ընթացքում շահառուն ձեռք կբերի աշխատանքային փորձ։ Այդ ժամանակահատվածի համար գործատուին կտրամադրվի ամսական 165,000 դրամ՝ որպես աշխատողի աշխատավարձի փոխհատուցում։
• 3 ամիս անց՝ աշխատանքային փորձի ձեռքբերումից հետո, շահառուն կշարունակի գործատուի մոտ աշխատանել, և հաջորդ 3 ամիսների համար գործատուին կտրամադրվի աջակցություն ամսական առավելագույնը 50,000 դրամի չափով՝ աշխատողի աշխատավարձից հաշվարկվող եկամտային հարկի, դրոշմանիշային վճարի և օրենքով սահմանված դեպքերում սոցիալական վճարի փոխհատուցման նպատակով։
  
  

Մասնագիտական ուսուցում, վճարվող աշխատանքային պրակտիկա և աշխատանքի տեղավորում

• Ուսուցումը կարող է կազմակերպվել ինչպես գործատուի մոտ, եթե վերջինս բավարարում է  ուսուցումն իրականացնելու համար անհրաժեշտ պայմաններին, այնպես էլ գործատուի կողմից առաջարկված ուսումնական հաստատությունում։ Ուսուցումը կարող է տևել մինչև 6 ամիս։ Այդ ընթացքում շահառուին կտրամադրվի կրթաթոշակ՝ ամսական 50,000 դրամի չափով, և ամսական առավելագույնը ևս 50,000 դրամ՝ որպես ուսման վարձի փոխհատուցում։
• Ուսուցումն ավարտելուց հետո շահառուի և գործատուի միջև կկնքվի աշխատանքային պայմանագիր՝ առնվազն 6 ամիս ժամկետով։ Առաջին 3 ամիսների ընթացքում աշխատողը ձեռք կբերի աշխատանքային փորձ։ Այդ ժամանակահատվածի համար գործատուին կտրամադրվի ամսական 165,000 դրամ՝ որպես աշխատողի աշխատավարձի փոխհատուցում։
• 3 ամիս անց՝ աշխատանքային փորձի ձեռքբերումից հետո, աշխատողը կշարունակեք գործատուի մոտ աշխատել, և հաջորդ 3 ամիսների համար գործատուին կտրամադրվի աջակցություն՝ ամսական առավելագույնը 50,000 դրամի չափով՝ աշխատողի աշխատավարձից հաշվարկվող եկամտային հարկի, դրոշմանիշային վճարի և օրենքով սահմանված դեպքերում սոցիալական վճարի փոխհատուցման նպատակով։ 

Ուշադրություն
Շահառուի հետ կնքված աշխատանքային պայմանագիրը մինչև դրա ժամկետի լրանալը լուծելու և նոր պայմանագիր չկնքելու դեպքում գործատուն պետք է Միասնական սոցիալական ծառայությանը վերադարձնի շահառուին ուսման վարձի փոխհատուցման համար կամ որպես կրթաթոշակ կամ աշխատավարձ վճարված գումարները։

Ներկայացվող պահանջները

• Ծրագրի շահառու կարող են դառնալ միայն 2023 թվականին Լեռնային Ղարաբաղից բռնի տեղահանված 16-ից 63 տարեկան անձինք։
• Ծրագրում որպես գործատու կարող են ներգրավվել բոլոր այն կազմակերպությունները (այդ թվում՝ հասարակական կազմակերպությունները), որոնք ունեն թափուր աշխատատեղեր` բացառությամբ հանրային ծառայություն իրականացնող պետական կառավարման համակարգի մարմինների։