Ծրագրի մասին

Ծրագրի շրջանակներում նախատեսվում է ներդնել ժամանակակից տեխնոլոգիաներ մշակվող գինեմետ սորտերի խաղողի մշակման գործում, հիմնել ինտենսիվ պտղատու այգիներ և հատապտղանոցներ, նպաստել ոչ ավանդական բարձրարժեք մշակաբույսերի մշակմանը, ինչպես նաև ներդնել ոռոգման արդիական համակարգեր և կարկտապաշտպան ցանցեր՝ նպաստելով գյուղատնտեսության ոլորտում տնտեսվարողների եկամուտների ավելացմանը։

Աջակցության տեսակները և չափերը

Ծրագրով նախատեսվում են աջակցության հետևյալ տեսակները՝

• վարկերի տոկոսադրույքների մասնակի փոխհատուցում,
• ծախսերի մասնակի փոխհատուցում։

Վարկերի տոկոսադրույքների մասնակի փոխհատուցումը տրամադրվում է հետևյալ դեպքերում․

• 0․5-500 հա տարածքում այգի հիմնելու և առաջին տարվա խնամքի ծախսերի համար, ընդ որում՝ 0․5 հա-ի դեպքում յուրաքանչյուր պտղատեսակի համար նախատեսվում է հիմնել մեկ ամբողջական այգի,
• 0.5 և ավելի հա տարածքի համար ոռոգման արդիական համակարգերի կամ մինչև 100,000 մ³ ծավալով ջրավազանների կառուցման կամ ընդլայնման, կամ 0.5-100 հա տարածքներում կարկտապաշտպան ցանցերի ներդրման համար, կամ՝ երկուսը միաժամանակ,
• 1-30 հա ծնեբեկի, պրասասոխի, ռուկոլայի, բրյուսելյան և պեկինյան կաղամբների, կոլրաբիի, գանգրակաղամբի (կալե), դեղին կամ մուգ կանաչ ցուկինիի և պատիսոնի, քաղցր եգիպտացորենի, ինչպես նաև հատիկաընդեղենների մշակման համար։

Կոնկրետ մշակաբույսերի դեպքում տրամադրվող աջակցության չափերի վերաբերյալ տեղեկանալու համար անհրաժեշտ է դիմել ՀՀ էկոնոմիկայի նախարարություն։

Ծախսերի մասնակի փոխհատուցումը տրամադրվում է հետևյալ դեպքերում և չափերով․

• 0.5 և ավելի հա հողատարածքների համար ոռոգման արդիական համակարգերի ձեռքբերում և ներդրում՝ կատարված ծախսերի 50% փոխհատուցմամբ, որը 1 հա-ի հաշվով չպետք է գերազանցի ծրագրով գնահատված ծախսերի առավելագույն սահմանաչափերի 50%-ը, իսկ բարձր ջրապահանջարկ ունեցող հողատարածքներում ներդրման դեպքում՝ կատարված ծախսերի 60% փոխհատուցմամբ, որը 1 հա-ի հաշվով չպետք է գերազանցի ծրագրով գնահատված ծախսերի առավելագույն սահմանաչափերի 60%-ը,
• մինչև 100,000 մ³ ծավալով ջրավազանների կառուցում կամ ընդլայնում,
• 0․5-3 հա բազմամյա տնկարկներում կարկտապաշտպան ցանցերի ներդրման համար համապատասխան շինարարական աշխատանքներ իրականացնող կազմակերպությանը (կապալառու) կփոհատուցվի կատարված ծախսերի 75%-ը, ընդ որում՝ 1 հա-ի համար ծախսերի սահմանաչափը գերազանցելու դեպքում ծախսերի մնացած մասը պետք է վճարի շահառուն,
• ոռոգման արդիական շարժական համակարգի ձեռքբերման համար յուրաքանչյուր շահառուի կփոխհատուցվի ձեռքբերման արժեքի 50%–ը, բայց ոչ ավելի, քան միավորի հաշվով 7.5 մլն դրամը, ընդ որում՝ յուրաքանչյուր շահառուի տրամադրվող փոխհատուցման հանրագումարը չի կարող գերազանցել 75 մլն դրամը:

Դիմելու կարգը

Վարկերի տոկոսադրույքների փոխհատուցման համար շահառուները պետք է՝

• մինչև ներդրման աշխատանքների սկսվելը դիմեն ծրագրին մասնակից ֆինանսական կառույցներին՝ վարկունակության բավարար մակարդակը ճշգրտելու նպատակով,
• ֆինանսական կառույցի վարկունակության պահանջները բավարարելու դեպքում վարկի ստացման համար ներկայացնեն պահանջվող փաստաթղթերը։

Ծախսերի մասնակի փոխհատուցման համար շահառուները պետք է մասնակցության դիմումը և պահանջվող փաստաթղթերն ուղարկեն Էկոնոմիկայի նախարարության secretariat@mineconomy.am էլեկտրոնային փոստի հասցեին։

Պահանջվող փաստաթղթերը

Վարկի տոկոսադրույքի փոխհատուցման համար պահանջվող փաստաթղթերն են՝

• անձը հաստատող փաստաթղթի պատճեն,
• անշարժ գույքի նկատմամբ իրավունքի պետական գրանցման վկայականի պատճեն։

Այգեհիմնման դեպքում անհրաժեշտ է ներկայացնել նաև՝ 

• հողատարածքի տեղի, հիմնվող այգու չափերի և պտղատեսակի, տնկման բանաձևի վերաբերյալ տեղեկատվություն,
• հողի ագրոքիմիական բաղադրության լաբորատոր փորձաքննության եզրակացության պատճենը (առավելագույնը 6 ամսվա վաղեմության),
• այգեհիմնման ժամանակահատվածում և հաջորդող 3 տարիների համար շահառուի և այգեգործության վերաբերյալ խորհրդատվական ծառայություն տրամադրող անձի միջև կնքված պայմանագիր։

Ոչ ավանդական բարձրարժեք մշակաբույսերի մշակման դեպքում անհրաժեշտ է նաև ներկայացնել՝

• կատարվելիք ծախսերի նախահաշիվ։

Կենսադինամիկ խաղողի այգու հիմնման դեպքում անհրաժեշտ է նաև ներկայացնել՝

• մշակման միջոցառումների նկարագիրը,
• համայնքի (վարչական շրջանի) ղեկավարի կողմից հաստատված տեղեկատվություն՝ այգեհիմնմանը նախորդող 3 տարիների ընթացքում տվյալ տարածքում մշակված մշակաբույսերի վերաբերյալ։