Վերադարձի վկայական ստանալու համար արտասահմանում գտնվող անձը կարող է անձամբ կամ լիազորված անձի միջոցով դիմել տվյալ երկրի ՀՀ դեսպանություն կամ հյուպատոսական հիմնարկ` նախապես այց ամրագրելով։

Այց ամրագրելիս անհրաժեշտ է նշել այն անձի տվյալները, ով անձամբ ներկայանալու է ընդունելության։

• ընտրել այն երկրի դեսպանության կայքը, որտեղ ներկայացվելու է դիմումը,
• էջի ձախ հատվածում սեղմել «Ամրագրել ժամադրություն» կոճակը,
• բացվող պատուհանում ընտրել «Վերադարձի վկայականի տրամադրում» տարբերակը,
• ընտրել հասանելի օրերից և ժամերից ամենահարմար տարբերակը,
• բացվող էջում լրացնել անձնական տվյալները և հաստատել ամրագրումը։

Պահանջվող փաստաթղթերը

Անհրաժեշտ է համապատասխան դեսպանություն ներկայացնել հետևյալ փաստաթղթերը․

• դիմում-հարցաթերթիկ,
• 35x45 մմ չափսի 2 լուսանկար,
• պետական տուրքի վճարման անդորրագիր։

Առկայության դեպքում ցանկալի է ներկայացնել նաև՝

• ժամկետանց կամ օգտագործման համար ոչ պիտանի, կորած կամ գողացված ՀՀ սահմանը հատելու իրավունք տվող փաստաթղթի (ՀՀ քաղաքացու անձնագիր, ՀՀ-ի կողմից տրված ճամփորդական փաստաթուղթ) պատճենը,
• տեղեկանք տվյալ բնակավայրի ոստիկանությունից կամ այլ իրավասու մարմնից՝ անձնագրի կորստի կամ գողության, կողոպուտի կամ այլ հանցագործության կամ որևէ աղետի հետևանքով անձնագիրը կորցնելու մասին։

Լիազորված անձի միջոցով դիմելու դեպքում լիազորված անձը պետք է նաև ներկայացնի՝

• լիազորագիր (նոտարական վավերացումը պարտադիր չէ),
• իր անձը հաստատող փաստաթղթի բնօրինակը։

Վճարման չափը և կարգը

Հայաստան վերադարձի վկայական ստանալու համար անհրաժեշտ է վճարել 20,000 դրամ։ Վճարումն անհրաժեշտ է կատարել առցանց եղանակով։

Տրամադրման ժամկետը և կարգը

Վերադարձի վկայականը տրամադրվում է 1 աշխատանքային օրվա ընթացքում։

Հարցումն ստանալուց հետո անձը նույնականացվում է ՀՀ արտաքին գործերի նախարարության կողմից, որից հետո վերադարձի վկայական տրամադրելու վերաբերյալ պատասխանն ուղարկվում է այն դեսպանություն կամ հյուպատոսական հիմնարկ, որը զբաղվել է տվյալ անձի դիմումով։ Անձին տեղեկացվում է վկայականի տրամադրման որոշման վերաբերյալ, ինչից հետո հնարավոր է վկայականը ստանալ համապատասխան դեսպանությունում կամ հյուպատոսական հիմնարկում։

Վերադարձի վկայականը հնարավոր է օգտագործել փաստաթղթի տրվելու պահից 30 օրվա ընթացքում։

Ուշադրություն
Եթե ժամկետանց կամ օգտագործման համար ոչ պիտանի անձնագիր ներկայացնելիս կասկած է առաջանում՝ արդյոք դիմողը անձնագրում պատկերված անձն է, ապա հյուպատոսական հիմնարկը վերադարձի վկայական տալու էլեկտրոնային հարցում է ուղարկում անձնագրային բաժանմունք։ Այս դեպքում վկայականը տրամադրվում է 5-15 աշխատանքային օրվա ընթացքում՝ պայմանավորված լրացուցիչ ստուգումներով։

ՀՀ վերադարձի վկայականն անվճար տալու դեպքերը

Վերադարձի վկայականն անվճար տրվում է՝

• նախկինում ՀՀ քաղաքացու անձնագիր չստացած ՀՀ քաղաքացիներին,
• 16 տարին չլրացած և 63 տարին լրացած ՀՀ քաղաքացիներին,
• օտարերկրյա պետությունից վտարման ենթակա ՀՀ քաղաքացիներին,
• այն անձանց, ովքեր դիմել են ՀՀ քաղաքացու անձնագիր ստանալու կամ փոխանակելու համար, սակայն դեռ չեն ստացել այն,
• պարտադիր զինվորական ծառայության զորակոչվելու, վարժական հավաքներին կամ զորահավաքներին մասնակցելու նպատակով ՀՀ մեկնող քաղաքացիներին,
• բազմազավակ ընտանիքի անդամ հանդիսացող ՀՀ քաղաքացիներին (բազմազավակ են համարվում 4 և ավելի անչափահաս երեխա ունեցող ընտանիքները),
• առաջին և երկրորդ խմբի հաշմանդամություն ունեցող ՀՀ քաղաքացիներին,
• ՀՀ դատարանների և այլ իրավասու մարմինների որոշումների հիման վրա ՀՀ մեկնող կամ տեղափոխվող քաղաքացիներին,
• օտարերկրյա պետությունների ազատազրկման վայրերից ազատված ՀՀ քաղաքացիներին,
• հափշտակության կամ այլ հանցագործության, բնածին կամ տեխնածին աղետի, քաղաքական հուզումների կամ պատերազմական իրավիճակների արդյունքում ՀՀ քաղաքացու անձնագրից զրկված անձանց՝ տվյալ հանգամանքն ապացուցող փաստաթուղթ ներկայացնելու դեպքում կամ եթե դեպքը հանդիսանում է հանրահայտ փաստ,
• ՀՀ այն քաղաքացիներին, որոնց մշտական բնակության երկրում ստեղծվել է քաղաքացիների կյանքին կամ առողջությանը սպառնացող արտակարգ իրավիճակ։

Հղում օրենսդրությանը

 ՀՀ կառավարության՝ 2011 թվականի մարտի 24-ի N 297-Ն որոշում

Որոշումը հնարավոր է գտնել arlis.am-ում։