Եթե անձը գտնվում է այնպիսի պետությունում, որտեղ չկա ՀՀ դեսպանություն կամ հյուպատոսական հիմնարկ, կամ այնպիսի հեռավոր վայրում, որտեղից հնարավոր չէ կամ դժվար է դիմել մոտակա ՀՀ դեսպանություն, ապա նա կարող է տեսակապով դիմել ՀՀ վերադարձի վկայական ստանալու համար։

Տեսակապով վերադարձի վկայական ստանալու համար անհրաժեշտ է նախապես էլեկտրոնային նամակի միջոցով հայտ ներկայացնել համապատասխան դեսպանություն կամ ՀՀ արտաքին գործերի նախարարության հյուպատոսական վարչություն: Անհրաժեշտ է լրացնել հայտի ձևը և այն ուղարկել համապատասխան դեսպանության էլ․փոստի հասցեին կամ ՀՀ արտաքին գործերի նախարարության vid@mfa.am էլ․ փոստի հասցեին։

Դեսպանության կամ վարչության աշխատակիցը 2 օրվա ընթացքում էլեկտրոնային նամակի միջոցով անձին առաջարկում է տեսազանգն անցկացնելու օր և ժամ, տեղեկացնում անհրաժեշտ տեխնիկական պայմանների, պահանջվող փաստաթղթերի մասին։

Պահանջվող փաստաթղթերը

Անհրաժեշտ է համապատասխան դեսպանություն ներկայացնել հետևյալ փաստաթղթերը․

• դիմում-հարցաթերթիկ,
• 35x45 մմ չափսի 2 լուսանկար,
• պետական տուրքի վճարման անդորրագիր։

Առկայության դեպքում ցանկալի է ներկայացնել նաև՝

• ժամկետանց կամ օգտագործման համար ոչ պիտանի, կորած կամ գողացված ՀՀ սահմանը հատելու իրավունք տվող փաստաթղթի (ՀՀ քաղաքացու անձնագիր, ՀՀ-ի կողմից տրված ճամփորդական փաստաթուղթ) պատճենը,
• տեղեկանք տվյալ բնակավայրի ոստիկանությունից կամ այլ իրավասու մարմնից՝ անձնագրի կորստի կամ գողության, կողոպուտի կամ այլ հանցագործության կամ որևէ աղետի հետևանքով անձնագիրը կորցնելու մասին։

Վճարման չափը և կարգը

Տեսակապի միջոցով վերադարձի վկայական ստանալու համար անհրաժեշտ է վճարել 45,000 դրամ։ Վճարումն անհրաժեշտ է կատարել առցանց եղանակով։

Անհրաժեշտ է նաև վճարել անհատական փոստային առաքման համար։ Վճարի չափը կարող է փոփոխվել՝ կախված երկրից։ Փոստային առաքման վճարումն անհրաժեշտ է կատարել առցանց եղանակով։

Տրամադրման ժամկետը և կարգը

Վերադարձի վկայականը տրամադրվում է 1 աշխատանքային օրվա ընթացքում։ 

Անձին տեսակապով նույնականացնելուց հետո ՀՀ ԱԳՆ-ն վկայականի բնօրինակը փոստային առաքմամբ ուղարկում է դիմողի կողմից նշված օտարերկրյա պետության հասցեով։

ՀՀ վերադարձի վկայականն անվճար տալու դեպքերը

Վերադարձի վկայականն անվճար տրվում է՝

• նախկինում ՀՀ քաղաքացու անձնագիր չստացած ՀՀ քաղաքացիներին,
• 16 տարին չլրացած և 63 տարին լրացած ՀՀ քաղաքացիներին,
• օտարերկրյա պետությունից վտարման ենթակա ՀՀ քաղաքացիներին,
• այն անձանց, ովքեր դիմել են ՀՀ քաղաքացու անձնագիր ստանալու կամ փոխանակելու համար, սակայն դեռ չեն ստացել այն,
• պարտադիր զինվորական ծառայության զորակոչվելու, վարժական հավաքներին կամ զորահավաքներին մասնակցելու նպատակով ՀՀ մեկնող քաղաքացիներին,
• բազմազավակ ընտանիքի անդամ հանդիսացող ՀՀ քաղաքացիներին (բազմազավակ են համարվում 4 և ավելի անչափահաս երեխա ունեցող ընտանիքները),
• առաջին և երկրորդ խմբի հաշմանդամություն ունեցող ՀՀ քաղաքացիներին,
• ՀՀ դատարանների և այլ իրավասու մարմինների որոշումների հիման վրա ՀՀ մեկնող կամ տեղափոխվող քաղաքացիներին,
• օտարերկրյա պետությունների ազատազրկման վայրերից ազատված ՀՀ քաղաքացիներին,
• հափշտակության կամ այլ հանցագործության, բնածին կամ տեխնածին աղետի, քաղաքական հուզումների կամ պատերազմական իրավիճակների արդյունքում ՀՀ քաղաքացու անձնագրից զրկված անձանց՝ տվյալ հանգամանքն ապացուցող փաստաթուղթ ներկայացնելու դեպքում կամ եթե դեպքը հանդիսանում է հանրահայտ փաստ,
• ՀՀ այն քաղաքացիներին, որոնց մշտական բնակության երկրում ստեղծվել է քաղաքացիների կյանքին կամ առողջությանը սպառնացող արտակարգ իրավիճակ։

Հղում օրենսդրությանը

ՀՀ կառավարության՝ 2011 թվականի մարտի 24-ի N 297-Ն որոշում

Որոշումը հնարավոր է գտնել arlis.am-ում։