Եթե անձը գտնվում է այնպիսի պետությունում, որտեղ չկա ՀՀ դեսպանություն կամ հյուպատոսական հիմնարկ, կամ այնպիսի հեռավոր վայրում, որտեղից հնարավոր չէ կամ դժվար է դիմել մոտակա ՀՀ դեսպանություն, ապա նա կարող է տեսակապով դիմել ՀՀ վերադարձի վկայական ստանալու համար։

Մինչև 16 տարեկան անձի դիմումը ներկայացնում է նրա ծնողներից մեկը կամ օրինական ներկայացուցիչը (հոգաբարձուն կամ խնամակալը)։

Տեսակապով վերադարձի վկայական ստանալու համար անհրաժեշտ է նախապես էլեկտրոնային նամակի միջոցով հայտ ներկայացնել համապատասխան դեսպանություն կամ ՀՀ արտաքին գործերի նախարարության հյուպատոսական վարչություն: Անհրաժեշտ է լրացնել հայտի ձևը և այն ուղարկել համապատասխան դեսպանության էլ․փոստի հասցեին կամ ՀՀ արտաքին գործերի նախարարության vid@mfa.am էլ․ փոստի հասցեին։

Վարչության աշխատակիցը 2 օրվա ընթացքում էլեկտրոնային նամակի միջոցով քաղաքացուն առաջարկում է տեսազանգն անցկացնելու օր և ժամ, տրամադրում տեղեկատվություն անհրաժեշտ տեխնիկական պայմանների, ներկայացվող փաստաթղթերի և այլ մանրամասների վերաբերյալ։

Պահանջվող փաստաթղթերը

Անհրաժեշտ է համապատասխան դեսպանություն ներկայացնել հետևյալ փաստաթղթերը՝

• դիմում-հարցաթերթիկ,
• 35x45 մմ չափսի 2 լուսանկար։

Առկայության դեպքում ցանկալի է ներկայացնել նաև՝

• ժամկետանց կամ օգտագործման համար ոչ պիտանի, կորած կամ գողացված ՀՀ քաղաքացու անձնագրի կամ ՀՀ-ի կողմից տրված ճամփորդական փաստաթղթի պատճենը,
• տեղեկանք տվյալ բնակավայրի ոստիկանությունից կամ այլ իրավասու մարմնից՝ անձնագրի կորստի կամ գողության, կողոպուտի կամ այլ հանցագործության կամ որևէ աղետի հետևանքով անձնագիրը կորցնելու մասին։

Եթե երեխան չի ստացել ՀՀ քաղաքացու անձնագիր, ապա անհրաժեշտ է ներկայացնել նաև՝

• ՀՀ կամ օտարերկրյա պետության իրավասու մարմինների կողմից տրված ծննդյան վկայականի բնօրինակը կամ դրա՝ նոտարի հաստատումով պատճենը,
• ծնողների անձնագրերի կամ նույնականացման քարտերի բնօրինակները։

Վճարման չափը և կարգը

ՀՀ վերադարձի վկայականն անչափահասներին տրամադրվում է անվճար։

Տրամադրման ժամկետը և կարգը

Վերադարձի վկայականը տրամադրվում է 1 աշխատանքային օրվա ընթացքում։

Անձին տեսակապով նույնականացնելուց հետո ՀՀ ԱԳՆ-ն երեխայի վկայականի բնօրինակը փոստային առաքմամբ ուղարկում է դիմողի հասեով։

Հղում օրենսդրությանը

ՀՀ կառավարության՝ 2011 թվականի մարտի 24-ի N 297-Ն որոշում

Որոշումը հնարավոր է գտնել arlis.am-ում։